ភ្នំពេញ៖ សាលាដំបូងរាជធានីភ្នំពេញបានសម្រេចផ្តន្ទាទោសមនុស្សជិត ៦០នាក់ដែលពាក់ព័ន្ធនឹងផែនការវិលត្រលប់ចូលស្រុករបស់លោក សម រង្ស៊ី ៩ វិច្ឆិកា ឆ្នាំ២០១៩។ ពួកគេត្រូវបានតុលាការកាត់ទោសពាក់ព័ន្ធអំពើញុះញង់ និងរួមគំនិតក្បត់ ដោយបានប្រកាសសាលក្រមធ្វើឡើងនៅព្រឹកថ្ងៃអង្គារ៍ ទី១៤ ខែមិថុនានេះ។

កញ្ញា សេង ធារី ដែលជាប់ពិរុទ្ធកំពុងតវ៉ានៅមុខសាលាដំបូងរាជធានីភ្នំពេញត្រូវបានកម្លាំងសមត្ថកិច្ចនាំខ្លួនភ្លាមក្រោយពីតុលាការបានប្រកាសសាលក្រម។

មេធាវីការពារក្ដីឱ្យកញ្ញា សេង ធារី គឺលោក ជួង ជុងី បានប្រាប់អ្នកយកព័ត៌មានថាលោកនឹងបន្តប្ដឹងឡើងឧទ្ធរណ៍បន្តទៀត ខណៈលោកបានឱ្យដឹងថាការប្រកាសសាលក្រមកាលពីព្រឹកមិញនេះបានផ្ដន្ទាទោសលោក សម រង្ស៊ី នឹងបក្ខពួកឱ្យជាប់ពន្ធនាគារម្នាក់ ៨ឆ្នាំ និងមានខ្លះទៀតជាប់ ៦ឆ្នាំ ព្រមទាំងចេញដីកាតាមចាប់ខ្លួនផងដែរ ខណៈខ្លះទៀតត្រូវជាប់ពន្ធនាគារ ៥ឆ្នាំនឹងត្រូវបានព្យួរទោស។

កាលពីឆ្នាំ២០១៩ មេដឹកនាំប្រឆាំងដែលកំពុងរស់នៅក្រៅប្រទេស សម រង្ស៊ី បានរៀបចំផែនការបរាជ័យមួយក្នុងការចូលស្រុកវិញនៅថ្ងៃទី៩ ខែវិច្ឆិកា និងញុះញង់ឱ្យកងកម្លាំងប្រដាប់អាវុធងើបបះបោរប្រឆាំងរាជរដ្ឋាភិបាល។ ផែនការនេះត្រូវបានបរាជ័យវិញក្រោយរដ្ឋាភិបាលស៊ើបដឹងនិងមានវិធានការចាប់ខ្លួនអ្នកពាក់ព័ន្ធជាបន្តបន្ទាប់៕